من قصص كرم (حــاتم الصـخـى )

لمحمد بن الشيخ سعد بن الشيخ محمد بن الشيخ ابراهيم بن سيف مواقف وقصص كثيره ولكن ابي اذكر واحده وذلك عن كرمه المفرط وهالقصه ناقلها من الشيبان وكذالك مكتوبه في كتيب اسمه (قطوف الازهار)وموجود في المكاتب مؤلفه السويدا

القصه
يقول في احد الليالي كان عند محمد ابن سيف عشاء ـــ في منزله في اللويمي ببقعاء ــــ ومتجمعين الناس عنده وصدف ان ابن عبيكه الشمري لفاء عليهم ويوم حصل المناسبه فايته دخل في مجلس ابن سيف مع الناس وكان محمد بن سيف كفيف البصر وهذا اللي خلا ابن عبيكه يتطمن بأن محمد ماراح يدري فيه حتى تنتهي المناسبه
ولكن احد الموجودين يعرف ابن عبيكه عز المعرفه وقال له (حيالله ابن عبيكه.ورد عليه انك واهم)ولكن ابن سيف انتبه وكان يعرف صوته تمام لانه صديق له من زمن طويل وقال انت هنا يابن عبيكه قال ابن عبيكه إي بلله يابو فهد قال ليه جاحد روحك قال والله لقيت كل شي فايت واللي تبي تسويه لي مسويه قبلي وقلت اشارككم واواصل دربي ( للشلقان ) لاني مستعجل
قال ابن سيف حياك الله .ويوم قلط عشاه لبن رمال الشمري قال للموجودين لاتروحون اثريه ذبح للظيف أبن عبيكه الذبيحه الثانية

وزعل ابن عبيكه من هالتصرف وقال يابن سيف (انا اطيب ربعي والله اني أقوم بتاخير الغداء للمغرب والعشاء لنصف الليل غديه يوافق مرار طريق وانت عشوين بليله!!؟؟ قال له ابن سيف (مدامه خظراء لاتحسّب.وانت تستاهل)قال له ابن عبيكه لكن هذا فسق والله اني خايف ان يجي يوم ماتلقاء اللي يجملك مع الناس.. وسبحان الله كأنه يعلم بماء يخفيه الزمن فلقد مرت على محمد بن سيف سنبن عجاف وذلك بسبب كرمه الزائد اللذي استحق عليه أسم حاتم الصخى . ( هذه القصة في حدود عام 1325هـ)


وتقبلوا تحيات أخوكم
أبو عبدالرحمن ـــــ محافظة بقعاء

الله يرحمه ويسكنه فسيح جناته علوم رجال ترفع الراس

دائم رائع يابو عبدالرحمن

مشكور ابو عبدالرحمن

وش ذا الكرم الله يرحمه عسى فيه احد من عياله طلع مثله ؟
ولا السيف واصلين الى المكارم كلهم حيهم وميتهم