شهر رمضان الكريم في ليبيا

أحب أعرفكم على عاداتنا في شهر رمضان المبارك في ليبيا
أحنا نجهز لرمضان قبله بشهر كل شي في المطبخ يكون جديد (طناجر . صواني. أكواب.) ونجهزو في اللحم المفروم . الطماطم ألمرحي. والحمص. والبطاطا وكل شي يجهز في البيت مش من السوق

أولا: اليوم ألي قبل رمضان أحنا في ليبيا نقول يوم الموسم

تجتمع كل العائلة في منزل الجد يتعشو وإحنا في ليبيا عندنا شي اسمه (عالة الشاهي ) هي غاز صغير ومعاه 3 حافظات وحدة فيها السكر وحدة فيها النعناع وحدة فيها أوراق الشاهى ومعاها 2 سخانات صغار وطاسه متوسطة أحنا نقو لولها ( اللاقامة) ونطيبو الشاهي طبعا نكونو كلنا قاعدين الجد والجدة والأعمام والعمات نديرو 3 أكواب اول مرة شاهي بس وتاني كوب شاهي ومعاه حلويات وتالت كوب شاهي ومعاه لوز والا كاكاوية ( فول سوداني) ونسهرو مع بعض وقبل الامساك بساعة نديرو الصحور ( ومعروف في ليبيا الصحور عصيدة ومعاها رب التمر والعسل والزبدة والزيت ) ونصلو الفجر ونرقدو كلنا

اول يوم رمضان :

الكل في منزل الجد نبدو في الفطور من الصبح عندنا اكلة اسمها الشربة والعصبان اساسيات في الفطور ونديرو البوريك والكفتة والمبطن والبيتزا وسمبوسك طبعا كميات كبيرة لان فطور كل العائلة وبعد الفطور نحطو عالة الشاهي ونشربو الشاهي وبعدها كل عائلة تروح لمنزلها تفطر في منزلها كل يوم وبعد الفطور نصلو التراويح وكل يوم عند عم او عمة وعند خال او خالة السهرية وعالة الشاهي والصحور

ليلة القدر :

طبعا تكون ليلة القدر في منزل الجد الفطور وصلاة العشي والتراويح وبعدين نسهرو مع الجد يحكي علي ايام زمان وعلي هجرة الرسول وعلي عاداتنا زمان وينصحنا ونقرو قران كريم الى الصحور نتصحرو ونرجعو لمنازلنا الى ليلة العيد نرجعو لمنزل العائلة ضروري من الصحور ليلة العيد والصبح نعيدو على الجد والجدة اولا وناخدو العيدية

انشاء الله يكون عجبكم رمضان في ليبيا

والله ما شاء الله عليكم وعلى جمعاتكم

هي احلى شي بالتمسك للعائلات

والله يديمها عليكم

وشوقتينا نجي نصوم عندكم رمضان كم يوم

يسلمو اختي ع الموضوع الجميل

ويعطيك العافيه .

مرحبتين بيك في اي وقت وان ماشالاتك الارض نشيلك على روسنا

عادات جميله مشكورة حبيبتى على الموضوع

يعطيكي العافيه اختي على مجهودك