الجزء الثاني عشر
=============
كان جالس بغرفته متمدد على سريره يتذكر ديم ويبتسم .....فجأه سمع صوت طلق ناري خلاه يفز من مكانه استغرب من هالصوت بهالوقت قال يمكن العاب ناريه المراهقين يهبلون بالناس بهالليل لكن الصوت اختفى فجأه مما اثار شكوكه توجه بسرعه للشباك طل منه شاف سياره ثامر مفتوح بابها حاول يركز اكثر واضح ان السياره مافيها احد..
طلع من غرفته متوجه لغرفه اخته سراب يبيها تكلم ديم وتسالها ان كان اخوها ناسي سيارته او وش المشكله؟؟.. طق عليها الباب بس مافي حس فتح الباب لقى الغرفه مظلمه وبارده واكيد انها نايمه.. يارب وش اسوى اللحين؟!
سبيلي الوحيد كان سراب.. اطلع اشوف وش صاير؟؟..
ولاانتظر يمكن يكون ثامر داخل يجيب شئ من البيت ويرجع؟؟..
لا لا انا لازم اطلع واتأكد بنفسي... لابس بيطلع شكلي بايخ طالع اطل فرضا شافني احد..
ااااه ياسراب لو انتي صاحيه كان خليتك تكلمين ديم وتتأكدين..
خطرت بباله فكره.. ليه مااتصل عليها انا الحين هي زوجتي مافيها شئ..
لكن الوقت متأخر الحين...
رجع عند الشباك شاف الوضع ماتغير باب السياره مفتوح والسياره مافيها احد...
على طول رفع تلفونه وبعد تردد اتصل على ديم...
======================
توها طالعة من دوره المياه ماخذه لها شور سريع قبل ماتنام.. سمعت صوت جوالها يدق رفعت الجوال انصدمت يوم شافت المتصل كانت هي مسجله الرقم عندها لانه هو عاطيها اياه يوم الملكه.. توقعت انه بيسولف او بيسلم,,
ديم بخاطرها بس هذا وقت مو مناسب يتصل فيه.. ارد عليه ولااطنش..
كيفه خليه عشان يتعلم ويعرف الاوقات اللي يتصل فيها...
تركته وراحت للتسريحه تمشط شعرها رجع الجوال يدق مره ثانيه ..
ديم: اووووووووووه وش عنده مصر الاخ.. كيفه مالي شغل فيه مايستحي يتصل بهالوقت..
ماصار لنا مملكين كم يوم وعلى طول اتصل...
حرام ليش اقول عنه كذا يمكن صدق يحبني وذبحه الشوق..
ابتسمت لما تخيلت هالشعور.. توجهت لجوال وترددت ترد عليه ولا لا...
شئ قالها لازم تردين عليه وتشوفين وش يبي؟؟..
رفعتها من غير ماتتكلم وقلبها يرجف بشده واطرافها بارده وحالتها حاله جاها صوته
عبدالعزيز: الووو
ديم بهمس: هـ .. هلا
عبدالعزيز: كيفك؟؟..
ديم: تمام..
عبدالعزيز: ديم اسف اني متصل عليك بهالوقت المتأخر.. بس بغيت اسألك اخوك ثامر بالبيت؟؟..
ديم بنفسها الحمدلله والشكر داق هالوقت يسأل عن اخوي من متى الصداقه؟؟...
عبد العزيز يكمل: لاني اشوف سيارته عند الباب مفتوحه ولافيها احد..
ديم: والله هو كان طالع بس مدري ان كان رجع ولا توه
عبد العزيز: انا قلت لايكون ناسي السياره ولاحرامي يحاول يفكها ويوم سمع صوت راح وتركها...
ديم متعجبه: السياره مفتوحه ومافيها احد؟!
عبد العزيز مايبي يخوفها ويكبر السالفه: خلاص عيوني بنزل اشوف وش القصه.. تامرين على شئ..
ديم: سلامتك..
اول ماقفلت منه اتجهت للشباك بغرفتها بس للاسف ماتقدر تشوف الا طرف السياره بس لمحت عبدالعزيز يطلع من بيتهم لابس ثوب من غير غتره وشماغ لاول مره تشوف شعره كان ناعم وقصير وهي يعجبها هالستايل تموووت فيه..
اول ماقرب عبدالعزيز من السياره وقف بمكانه من الصدمه ثامر طايح من غير ولاحركه والدم مالي المكان قعد يتلف حوله ومو مستوعب اللي يشوفه..
صار يروح ويجي من الربكه مو عارف وش يسوي مو عارف كيف يتصرف..؟؟..
على طول توجه لبيتهم ودخل وكل هالشئ يصير قدام عيون ديم بس الشئ الوحيد اللي ماانتبهت له هو وجود اخوها عالارض..
بعد اقل من دقيقتين طلع عبد العزيز من البيت وبيده مفتاح سيارته شغل السياره وراح عند ثامر حاول يسحبه بس ماقدر وبهالحظه جته قوه مو طبيعيه شاله مثل الاطفال وركبه بالسياره وراء وانطلق الى المستشفى بسرعه جنونيه...
بعد هالمنظر انهارات ديم شافت اخوها من غير أي حركه شافته من دون نفس والدم مغطي صدره... وش السالفه؟؟.. انا اكييييد احلم.. يارب يكون كل اللي صار مو صدق..
اعصابها تعبت مو قادره تتحمل اللي شافته لازم تدق على احد من اخوانها لازم تعلم احد لكن امها وابوها لا.. حرام اخوفهم.. مافي الانوف اتصل عليها اللحين واسألها عن تركي ان كان عندها ولا لا؟؟...
اتصلت عليها وانتظرت الجواب...
نوف من غير ماتعطيها فرصه تتكلم: اهليييييييين وش هالمفاجئه الحلوه
ديم بصوت مبحوح: نوف
نوف: ديم وش فيه صوتك كذا
ديم: تركي عندك؟؟..
نوف: ايه قبل نص ساعه جاء بس دخل ينام
ديم وماتبي تصحي اخوها وتفجعه: طيب خلاص اكلمك بعدين مع السلامه..
نوف: تعالي وش فيك؟؟..
ديم وهي تقفل الخط: بعدين بعدين
وبدون تردد اتصلت على احمد...
ديم بصوت منهار باكي: خالي الحق ثامر اخوي مدري وش فيه؟؟..
احمد وراح فكره بعيد: وش فيكم متهاوشين بعد؟؟...
ديم : خالي السالفه اكبر من كذا..( وقطع صوتها الصياح)
احمد: وش فيك تصيحين والله مو فاهم ولاكلمه
قعدت ديم تحكي له اللي شافته...
احمد ومو مصدق: وبأي مستشفى الحين؟؟
ديم: مدري عن شئ .. الحين برسللك رقم عزيز كلمه واساله...
احمد: اوكي بسرعه...
قفلت وارسلت الرقم لخالها وحاولت تتصل على سراب لكن للاسف حصت جوالها مقفل اكيييد نايمه..
===================
مو جايها النوم تفكر بحياتها تحاول تتأقلم لكن مو قادره كل شئ حولها يقولها ان زوجها خاين.. قعدت تتامل فيه نايم جنبها .. ااااخ منه عليه اسلوب اذا شافني معصبه يعرف كيف يمتص الغضب واذا حس اني متضايقه يعرف شلون ينسيني..
احبك لكن انت خاين تلعب من وراي وعلى بالك مو حاسه باللي صاير.... بهاللحظه حست انها تبي تجلس عالنت وتشوف وش في مصايب جديده ماعرفتها عنه نزلت من سريرها فتحت الثلاجه صبت لها كأس عصير واتجهت للكمبيوتر اتصلت بالنت وسوت تسجيل دخول لايميل زوجها... للاسف مالقتها اون لاين لكن شافت 3 اشخاص موجودين ماتدري مين واحد منهم دخل عليها..
البعد صعب وكل شئ تحملناه.. الا المفارق ماقوينا نشيله.... ويلكموووووووووو
تفأجأت بشاير بهاللي دخل ولاعرفت كيف تتصرف؟؟.. ياترى ولد ولابنت؟؟.. اتكلم واشوف!!..
لااخاف يطلع خوي سعد واتوهق... ليش انا اصير غبيه يمكن تطلع بنت ثانيه واكتشف بلاوى جديده...
البعد صعب وكل شئ تحملناه.. الا المفارق ماقوينا نشيله.... ياهوووووووووووه وين الناس؟
انا احسب اني جالس وسط ناسي.. واثاريني جالس بين شله جواسيس... اهليييين
البعد صعب وكل شئ تحملناه.. الا المفارق ماقوينا نشيله.... هلاوالله وينك يالقطوع
انا احسب اني جالس وسط ناسي.. واثاريني جالس بين شله جواسيس... الدنيا مشاغل بعد ماتزوجنا ماصرنا نفضى لاحد..
البعد صعب وكل شئ تحملناه.. الا المفارق ماقوينا نشيله.... اقول لاتصير سكانه زوجته...
بشاير بقلبها تقول ياثقل دمك بس ورجعت تكتب بالكيبورد...
انا احسب اني جالس وسط ناسي.. واثاريني جالس بين شله جواسيس... هههههههههههههههه الله يرجك..
البعد صعب وكل شئ تحملناه.. الا المفارق ماقوينا نشيله.... صح قبل ماانسى تذكر خالد زميلنا ايام الكليه...
بشاير مسكت قلبها ماتدري تفرح ولا لا؟؟.. طلع خوي سعد الحمدلله مو بنت.. الله يستر لايقوله شئ واروح فيها انا...
بسرعه سوت تسجيل خروج وطلعت... غبيه انا ليش طلعت حتى لو قاله انه حصل احد
اون لاين راح يتوقع انه الشخص اللي سارق ايميله....
التفتت على زوجها وهي تهز راسها الله يستر مدري وش بعد وراك ماعرفته..!!!
==================
عالساعه 3:30 الفجر ارتفعت المأذن بصوت الحق يعلن دخول وقت صلاه الفجر وبدت القلوب تجيب نداء ربها ..
في بيت بدر وابتهال طلع بدر من دوره المياه والمنشفه بيده ويمسح قطرات الماء... التفت على ابتهال اللي كانت تلف الجلال استعداد لادأ الصلاه..
بدر: سديم لاتطيح رجعيها سريرها..
ابتهال: الله يعين كل يوم على ذا الحال...
رفع جواله بيشوفه قبل مايطلع المسجد تفاجئ بــ 4 مسد كووول من احمد استغرب لكن مالبث ان تغيرت ملامح وجهه يوم قرأ المسج..
(( ثامر بحاله مايعلم فيها الا الله.. اول ماتشوف المسج تعال على مستشفى دله بسرعه ))
بدر يكلم نفسه الله يستر طبعا ماعلم زوجته ولاشئ اخذ مفتاح السياره وقبل مايطلع التفت على ابتهال..
بدر: ترى يمكن ماارجع البيت بعد الصلاه نامي لاتقلقين..
ابتهال: براحتك..
طلع ركب سيارته متجهه للمستشفى وهو يفكر وش اللي ممكن يكون صاير..
=====================
بنفس الوقت لكن بمكان ثاني كانت ديم توها مخلصه صلاه الفجر.. رجعت مسكت جوالها واتصلت عليهم مره ثانيه لكن مافي جواب.. لها اكثر من ساعه ونص تحاول تتصل على احمد او عبدالعزيز وكلهم مايردون عليها زاد قلقها اكثر اكييييد في شئ ولا ماكان طنشوني..!!!!!!!
سمعت صوت بابها ينفتح التفتت كانت امها..
ام بدر: صليتي..؟؟
ديم وتحاول تكون طبيعيه: ايه
ام بدر: اخوك ثامر الله يصلحه مارجع الا الان...
ديم وماتبي امها تقلق: تلقينه سهران ومبسوط
ام بدر: انا خايفه عليه يكون صار له شئ لاني دقيت عليه كذا مره مارد على وابوك معصب عليه انه مارجع الى هالوقت..
ديم: لا ان شاء الله مافيه الا العافيه...
طلعت امها من عندها وديم تفكر وش ممكن يصير لو طلع تفكير امي صحيح...
=====================
طلعت شمس اليوم الجديد وتحمل خلفها الكثييييييير من الاحداث والاقدار اللي مااحد يتوقعها...
في بيت ابو بدر وتحديدا بالصاله كانت ديم الي ماغفت لها عين وامها وابوها وتركي اللي اتصلت عليه امه وقالت له يجي عشان تسأله عن اخوه جالسين مع بعض ومو عارفين اللي قاعد يصير ديم الوحيده اللي شافت اخوها ينزف دم وماتبي تقولهم وتقلقهم بالبدايه فضلت السكوت لكن اللحين الموضوع مايتحمل مو قادره تشوف امها وابوها خايفين عليه ولاتتكلم لازم يعرفون كل شئ...
ديم بتردد: يمااااا يباااااه
التفتوا عليها...
ديم: امس صار شئ بليل انا ماعلمتكم عنه لكن اللحين بتكلم..
علقوا عيونهم عليها بيشوفون وش عندها ؟.. اول ماخلصت كلامها انفتح باب الفله ودخل منه بدر واحمد ووجيههم سوداء وعيونهم حمراء واول ماشافوهم مجتمعين بالصاله نزلوا روسهم للارض والكل مترقب احد يدخل بعدهم والعيون كلها تسأل وييييييين ثامر؟؟!!!!!!!!!!!!!!
مايحتاج اكمل مو قادره اكتب اكثر عن هالمشهد عيني دمعت اعتقد واضح للجميع
ثامر يطلبكم الحل
وانا بهاللحظات مو بوسعي الا اسبق الكل واقول لاهله عظم الله اجركم واسكن الفقيد فسيح جناته انه قادر على ذلك...
كنت ابوصفلكم الحال ... لكن صوت صراخهم وولولتهم اخترقت أعماقـي .. ومنعت أناملي عن الكتابـة ....
===================
وفي مكان ثاني بعيد عنهم بمركز الشرطه.. القاتل الي سدد الرصاصه لثامر اتجه لهم من الليل وسلم نفسه تدرون منهو؟!!!!
اخووو البنت اللي ركبها ثامر ومسكته الهيئه بسبته..
الضابط وتوه منزل سماعه التلفون: تقرير المستشفى يقول انه مـــــــــات
اخو البنت بنشوه فرح: اخيرا انتقمت لشرفي..
الضابط: انا لله وانا اليه راجعون
اخو البنت: يستاهل اكثر لو بيدى كل يوم اقتله من جديد عشان احس باللذه
الضابط: حرام عليكم شباب في عمر الورد تروحون بقضايا مثل كذا
اخو البنت: الله يأخذ هالعمر اذا كان الواحد بيعيش فيه منزل راسه للارض..
الضابط: ياناس هاذي رابع حاله تمر على الواحد بينتقم يذبح اللي يعرف اخته بدال مانخسر واحد نخسر اثنين...
اخو البنت التزم الصمت...
الضابط: يعني البنات الله يهديهم لو مافتحوا مجال للشباب انهم يتعرفون عليهم ولاطلعوا معهم ماكان صارت عندنا هالنوع من القضايا
اخو البنت وشكله كاره نفسه ويكلم الضابط كنه خويه: ياابن الحلال كل ساقط وله لاقط..
بعد دقايق نادى الضابط العسكري اللي واقف عند الباب وطلب منه ياخذه للسجن لما تتضح معالم القضيه ويشوفون باقي الاطراف...
=====================
بعد صلاه العصر من نفس اليوم كانت صلاه الجنازه على ثامر الله يرحمه...
الجميع حضر الصلاه وكان باين التأثر على ابوه واخوانه وخاصه احمد اكثر واحد فيهم كانت معالم الالم باينه عليه الله يعينهم ويصبرهم خاصه وانه موووت فجعه والرسول عليه الصلاه والسلام تعوذ بأحد الحاديث من موت الفجعه اللهم ابعدنا عنه وابعده عن كل مسلم ياحي ياقيوم.. بعد كذا توجهوا للمقبره والسنتهم تلهج بالدعاء له..
واخيرا اجتمعوا ببيت ابو بدر.. عند الرجال عبدالعزيز كان واقف معهم وكان اكثر واحد متماسك..
عبدالعزيز: الله يرحمه ادعووو له بالرحمه هو اللحين يبي منكم الدعاء
ابو بدر والعبره خانقته: انا بس ودي اعرف من له مصلحه يقتله
بدر هو الوحيد اللي كان عارف بسالفه الهيئه هو واحمد وتوقع انهم اخوان البنت بس ماتكلم من باب اذكروا محاسن موتاكم...
احمد يلتفت على بدر وبصوت واطئ بحكم ان المجلس مليان: مافي الا اخوان البنت
بدر: انت شايف الشرطه اليوم بالمستشفى بدو يحققون... بعدين نتكلم بالموضوع..
تركي: انا بعرف وش اللي صار له كنا سهرانين مع بعض ومبسوطين وفجأه...(ماقدر يكمل وطلع برى المجلس)
ياسر اللي رجع كنه طفل صغير لان الموقف مو مستحمل: بفهم من ذا اللي يكره اخوي.. حسبي الله عليهم..
واحد من الرجال الكبار بالسن: اذكروا الله ياجماعه.. كلنا لها.. الدنيا هاذي لو دامت لغيرنا ماوصلت لنا
الكل: لااله الاالله محمدا رسول الله...
وهلت جموع المعزييين تزداد والكل متعجب وخاصه انه مات مقتول والكل يتسأل عن السبب؟؟..
=========================
بنفس البيت عند الحريم ام بدر كانت متماسكه وحاولت تبين قدام الناس انها قويه وطول وقتها تذكر الله ولاخلت الشيطان يوسوس لها عكس ام احمد اللي من عرفت بالخبر ودمعتها ماوقفت... اما ديم مسكينه هالبنت ملتاعه كل شئ صار قدامها شافت الموت البطئ لثامر وكانت ساكته كتمت بقلبها طووول الليل واللحين مهي مستوعبه ليش كل هالناس عندهم بالبيت..!!!!!!
سراب طلعت لها بغرفتها لانها ماجلست مع الناس الا بالبدايه..
سراب تمسح دموعها: ديم خلاص ياعمرى حرام اللي تسوينه بنفسك
ديم: سراب وش القصه؟؟.. ثامر وش صار له بالضبط عقلي مو قادر يستحمل امس المغرب كان جالس يتقهوى معنا...
سراب ضمتها وجلست تبكي هي وياها...
ديم تبعد عنها: علميني وش صار؟؟..
سراب: عزيز يقول انه سمع طلق ناري ويوم طلع يشوف لقى ثامر مافيه روح.. راحوا المستشفى بيتاكدون....
ديم تقاطعها: هو هو الله خلاه يموت ليه يوم سمع الصوت مانزل له بسرعه واسعفه...
سراب: انتي وش قاعده تقولين؟؟
ديم: ايه اخوك دق علي وسألني...
ماكملت كلامها لان الباب انفتح عليهم جت نوف تقولهم ان صديقتهم بشاير موجوده تحت...
نزلوا تحت وسراب مااخذت على كلام ديم لانها تدري انها بحاله مو طبيعيه وقاعده تقول كلام ماتعنيه...
اول ماشافت بشاير ضمتها وجلست تبكي بحضنها وحاولت تهديها وتخفف عنها قد ماتقدر...
عند الحريم...
ام طلال: سبحان الله بغمضه عين كل شئ يروح...
وحده من الحريم: هم السابقون ونحن اللاحقون...
ام عبدالعزيز: الله يوسع له قبره ويسكنه جنات النعيم...
ام بدر ماشاء الله عليها متماسكه لاخر حد: جزاك الله خير..
الهنوف تصيح: خلاص يماااه لاتضيقين صدورنا
العنود صوتها مبحوح: ايه والله يما خليك قويه اكثر خاصه عشان الجوهره...
ام احمد وكلامها مو مفهوم من الصياح: ثامر هذا ولدي من هو صغير وانا احبه و...
نوف: يمااا منيره خلي ايمانك بالله قوى
بدت الناس تطلع بعد ماادوا واجب العزاء ومابقى الا اهل ام بدر بهاللحظه ماقدرت ام بدر تصمد وتتماسك اكثر من كذا طلعت غرفتها وقفلت الباب عليها..
وهلت دموعها على ولدها الغالي...
===================
مرت الثلاثه الايام العزاء ثقيله عالجميييع وقد مايحاولون يتناسون اللي صار ترجع ذكراه تتجدد قدامهم...
في بيت ام احمد حاولت تشغل نفسها بذكر الله والصلاه...
اما احمد مسكين بخلوته ينقلب شخص ثاني الدمع يفيض من عينه كنه طفل ماكنه رجال طول وعرض ماينلام اللي صار مو هين..
اللحين حنا بالثلث الاخير من الليل قام احمد يصلى له ركعتين بعدها رفع يده يدعو بالرحمه والمغفره لثامر.. مد يده للمصحف اللي عالكومادينه وقعد يقرأ فيه حوالي ربع ساعه..
قفل النور وتمدد عالسرير سحب جواله يقلب فيه دمعت عينه يوم شاف مسجات ثامر له اخر مسج منه كان بنفس اليوم الي توفى فيه كان يستعجل احمد انه يجي للمقهى..
مازال مستمر يقلب ويقلب وكل ماقرأ شئ رجع بذاكرته للوراء وتذكر كل شئ صار بينهم خاصه وانه هو كان قريب منه مرره من يوم هم صغار كانوا اكثر من اخوان..
مسح دمعته وكمل قرايه الرسايل لما وصل للمسج اللي وصله من شهرين بالغلط من نوف مايدري ليش يحس بتعاطف مع هالبنت مشفق عليها ان ربي باليها هالبلوه..
ومن غير شعور لقى نفسه يكتب لها هالمسج..
(( فرحني كثير توبتك من المكالمات لكن اختي ماتشوفين ان الرسايل باب من ابواب الشيطان.. دعواتي لك ان يفتح الله على قلبك ويهديك ويصلح حالك..))
==================
مستلقى عالكنبه اللي بالصاله ويحس ان هموم الدنيا على راسه مو متخيل انه خلاص ماراح يشوف اخوه بعد اليوم والله ماينلام شعور صعب عليه..
لاول مره من تزوجوا تحس نوف بالتعاطف مع زوجها مسكين اللي جاه مو شوي قربت منه وقالت له بهمس: تركي
التفت عليها وعلى طول نزل راسه للارض...
نوف: وش فيك؟؟
تركي: ولاشئ ابي اجلس لحالي
نوف: ليه ماتنام شف الساعه ثنتين ونص..
تركي: لوسمحتي خليني لحالي
نوف قدرت شعوره: تبي اصلح لك شئ تأكله..
تركي: لاشكرا
كانت بتتكلم بس سمعت صوت مسج واصلها على جوالها استغربت من اللي مرسلها بهالوقت رجعت غرفتها سحبت الجوال انصعقت يوم شافت المرسل " خالي احمد"
قرت الرساله وهي تحاول تكذب نفسها او انها تتخيل لكن الرساله قدامها مافي مجال
الحمدلله مرسلها وهو مايعرف انا مين يدعي لي بالهدايه...
تنهدت براحه ورجعت الجوال مكانه وحمدت ربها انه ستر عليها سبحان الله رب ضاره نافعه
بس انا لازم اقطع هالخوف من قلبي واغير الرقم وارتاح... هالمسج خلى نوف تعيد حساباتها عرفت انها بنعمه عظيمه... طلعت من غرفتها للصاله..
نوف قربت من تركي مسكت يده لاول مره من تزوجت تسوي هالحركه: حبيبي لاتضيق صدرك ثامر هذا يومه..
تركي وحاس بلمسه دفئ: مو قادر يانوف هذا اخوي تدرين وش يعني اخوي
نوف: حرام عليك ارحم نفسك من ثلاث ايام مادخل شئ لفمك
ومن غير ماتسمع رده اتجهت للمطبخ تصلح لهم عشاء خفيف..
===================
رابع يوم بعد العزاء... المغرب
ديم بغرفتها تتامل اغراض ثامر اللي استلمها اخوها بدر من المستشفى وجابها البيت
(مفاتيح السياره – المحفظه – الجوال ....) اخذتها بنفس اليوم من الصاله ودخلتها درج الكومادينه بغرفتها طالعت بالجوال كانت البطاريه تأشر انها ضعيفه وصلته بالشاحن وهي تحمد ربها انه ماقفل ولاكان ماعرفت كيف تفتحه لانها ماتعرف الرقم الشخصي...
كان فيه 63 مسد كول و 14 مسج كل الاتصالات كانت من اخوياه الظاهر كانوا بيتأكدون من الخبر اللي وصلهم والمسجات نفس الشئ الناس كانت مو مصدقه..
ديم بداخلها تساؤلات كثيره من اللي له مصلحه يذبح اخوي بهالطريقه البشعه اكيد الموضوع فيه سر وانا لازم افك الغموض واعرف كل شئ وهذا هو الدافع اللي خلاها تخلي جوال اخوها معها وتعيد شحنه...
التفتت لجوالها من ايام العزاء مقفل مارضت تستقبل اتصالات من احد مالها خلق لاحد
قررت اليوم انها تفتحه وتشوف في احد مرسلها شئ.. اول مافتحته توالت المسجات عليها يمكن جاها حوالي 11رساله خمسه منهم من عبد العزيز لانها مارضت تكلمه فارسلها يعزيها
فزت من مكانها على اتصال جايها طالعت بالشاشه كان المتصل عبدالعزيز.. مسكين شكله من ثلاث ايام يحاول يتصل ولانزل التلفون من يده...
ديم: الوو
عبدالعزيز بلهفه: هلا ديم.. كيفك؟؟
ديم: بخير
عبدالعزيز: عظم الله اجرك
ديم والعبره خانقتها: انت اللي ذبحته خليته ينزف لما مات..
عبدالعزيز: وش هالكلام؟؟..
ديم: خلاص ثامر راح
قعدت تصيح صياح هستيري وحاول عبد العزيز يهدي فيها وهي مازالت مستمره بالبكي
عبدالعزيز: عمري اهدي شوي
ديم كلامها مو مفهوم: انا تعبانه الحين بقفل...
عبدالعزيز: سلامتك ماتشوفين شر.. انتبهي لنفسك
ديم: مع السلامه...
وقفلت من غير ماتسمع رده
على طول توجهت لدفترها الوردي تشكي له عل وعسى يخفف عنها بعض احزانها...
اليك اكتب سطورا من صميم فؤادي
سطورا اعلم يقينا انك لن تقرأها
او تراها تعبر عما في نفسي !!
ربما ماكنت اعلم اني احبك بهذا القدر...
كم اشتاقت يدي لمصافحه كفك الحنون
وكم دمعت عيني عند ذكراك
وحن قلبي وامتلاء لهفه لمرأى وجهك البشوش....
.
.
اشتقت اليك كثيرا..
اشتقت لبسمتك
لصوتك
لجلستك وقهوتك...
كم بدت القهوه مره المذاق.. وكم تغيرت حلاوه التمر في فمي..
لقد كنت غير مصدقه ربما تعود..
انظر الى مكانك الخالي فتدمع عيناي.. ارمق باب البيت الصامت
ترى كم احن اليك والى خطواتك
اااه دمعه تنساب من عيني شوقا للقائك وسماع حديثك
.
.
احبــــــــــك
فهل ياترى عبرت هذه الكلمه عما في صدري؟؟
عما حمله قلبي من عذاب فراقك؟؟
كم صحوت فرحه سعيده عندما اراك في منامي..
بالامس فقط استطعت ان ادخل غرفتك من بعدك
كم بدت خاليه وضيقه.....
لم استطع البقاء فيها
اتعلم لماذا؟؟
لاني تذكرت يوم ان كنت فيها.. فلم املك نفسي
رحمك الله يااخي الغالي..
===================
في بيت ام طلال جالسين في الصاله وكل واحد بيده كوب شاهي...
ابو طلال: وش اخبار اخوك ومرته؟؟
ام طلال: الله يصبرهم ودي اروح لهم بكره
بسمه: يمه مسكينه ديم مره متأثره عكس امها
ام طلال: امها تلقين قلبها متفطر بس تحاول تبين قويه الله يعينها
ابو طلال يحاول يكمل الكوب بسرعه بيطلع: حتى اخوك وعياله وخالهم احمد اظن اسمه كلهم يضيقون الصدر باين انهم متأثرين
طلع ابو طلال وجلست بسمه وامها...
ام طلال: جيبي التلفون خل بكلم اخوك فشيله مادق على خاله يعزيه..
بسمه: عندك رقمه؟؟
ام طلال: ايه اخر مره دق اخيرا عطاني اياه
بسمه: وين حاطته يماااه
ام طلال: باول درج
راحت بسمه تجيب لامها الرقم وقربت لها التلفون...
رفعت ام طلال السماعه وضربت الرقم وانتظرت الجواب..
بعد شوي التفتت على بنتها وعلامات التعجب على وجهها: ردت على بنت
بسمه: اكيد يمااااه عاطيك الرقم غلط...
ام طلال: لامتأكده انه صحيح لانه عدته عليه وقالي صحيح
بسمه: اجل شكلك غلطتي وانتي تدقين الر قم..
ام طلال: يمكن...
بسمه: هاتي يمااا انا اضرب لك الرقم...
بعد ثواني جاهاااا نفس الصوت صوت بنت....
بسمه تكلم امها: غريبه بنت ردت...
بسمه: hello
البنت: hello
بسمه: ? how are you
البنت: Iam fine
بسمه: wher is talal?
البنت:who is talking? .. talal is go to super market
بسمه: don't keer who me .. thanks
قفلت والتفتت على امها : ايه يماا الرقم صحيح لان البنت تقول انه طالع لكن من هالبنت؟؟
ام طلال وحاطه يدها على صدرها: ياويلي من تكون ذي.. انا قايله ماابيه يروح للخراب
بسمه: يمكن هو بسكن وهاذي طالبه معه والخط مو له الحاله
ام طلال: الله يستر..
=================
بعد مرور اسبوع عزمتهم العنود عندها بالبيت تبي امها واختها يطلعون من بيوتهم عشان ينسون شوى وتحاول قدر الامكان انها تعيشهم بجووو ثاني بعيد عن المكان اللي كان فيه المرحوم ثامر..
العنود: من زمان ماجيتوا بيتي .. توه ماتبارك المكان
نوف: ايه دايم حنا اجتماعاتنا في بيت امي منيره ولا خالتي الجوهره..
ام احمد: المفروض نغير كل اسبوع عند وحده...
الهنوف: ايه خلاص اجل الاسبوع الجاي نطلع برى البيت نروح منتزه
نوف: ليش انتي خالتي ماتبينا نجي بيتك
ابتسمت ديم ابتسامه خفيفه لنوف لانها فهمت قصدها...
الهنوف بنظرات حقد: وش قصدك؟؟..
الجوهره برغم الالم اللي بداخلها الا انها تحاول تجاريهم: ماقصدها شئ تمزح معك
ديم بترقعها زودتها: نست ياخاله انك متهاوشه انتي ورجلك
الهنوف وصوتها بدى يعلى: نعـــــــم ياحبيبه امك...
نوف: ديم ماقالت شئ غلط...
الهنوف: بناتكم حيوانات قليلات ادب مايحترمون احد
ديم والنفسيه تعبانه: خلينا الاحترام لك
العنود تحاول تخفف من حده الموقف: نوف خذي ديم لغرفتك فوق
بعد ماطلعوا البنات فوق
ام احمد: انتي ماتستحين دايم حاطه عقلك بعقولهم..
الهنوف: يرفعون الضغط بناتكم ماتربوا
تضايقوا الجوهره والعنود من كلمه اختهم لكنهم ماعلقوا
العنود: الله يهديك يالهنوف ماعندك نيه ترجعين لرجلك؟؟..
الهنوف: خل يرجع لي فلوس ويعرف قيمتي بعدين يصير خير..
العنود: والله انه رجال ماينعاب ابو نايف يقول انه طوال ايام العزاء واقف معهم ماتركهم..
ام احمد: جزاه الله خير..
العنود: ترى الصبر له حدود يعني الايام الجايه توقعي منه أي شئ
الهنوف: انا الي الله يعظم اجري مستحملته...
قعدوا ينصحون فيها ويحاولون يقنعونها ماتهدم بيتها بيدها.. الجوهره تسحبت من غير مايحسون فيها قعدوا يدورونها بكل البيت ماحصلوها طلعوا الحوش لقوها تمشي الحالها ودموعها على خدودها قربت منها العنود وضمتها وام احمد يوم شافتهم كذا ماقدرت تستحمل ودخلت البيت...
================
الى هنــــا ينتهي الجزء الثاني عشر
والى هنا ان شاء الله تنتهى الاحزان
يارب يجعلها خاتمه الاحزان للجميع
الجزء هذا شبيشل.... عارفه انه كان كيئب حبتين بس هذا كله بحكم الحدث اللي صار
وحاولت قدر الامكان اني مااتوسع بالاحداث واكتب الاشياء المهمه لكن كثره عدد الشخصيات ومكانه ثامر عند كل شخصيه هي اللي اضطرتني اني اصف لكم الحاله النفسيه للجميع
اتمنى اكون وفقت بنقل ردات الفعل لكم ونقل الصوره بشكلها الصحيح
انتظروني الجزء القادم وباذن الله بيكون احلى...
..&تحياتي&..
