البرجون هع

عسكريمه · 07-01-2007, 07:12 AM

سلخييييير

ياهلا والله كيف الحال ؟؟

والله يا انااا من زمان ما كتبت واحس اني مستحيه <<< ابوك يالحياء

ايه ادري ان فيه بعض الناس تقووول في قلبها (( حياء مريخ ))

المهم ماعلينا من هذا كله
اللي علينا منه اني ابقولكم سالفتنا اللي صارت يوم الجمعه
اللي قبل يومين

تبي تقولون طيب حنا وش دخلنا
ابقولكم فاضيه وماعندي شئ وعيا يجيني النوم
قلت خل اسولف عليكم غديه يجين النوم من كثر ما اطق طق

هذا الله يسلمكم ..
كنا يوم الجمعه متعللين ببيت ام المزاييين وفالينها بحكم اننا داجات
وماحنا مداومين يوم السبت

وام المزايين بنت الحلال تمشي وتتثاوب مثل قوله انقلعوو
والله اني خفت على حنكه لا يطيح

وانا والله ما حسيييت الين دقت امي علي

الوالده : الوو هلا السلام عليكم <<< جابت كل ادوات الترحيب ومشتقاتها
وينك وراتس ما جيتي؟؟

عاد انا ارد علي امي كنه عندي ازعاج
مانيب اسمعتس يمه علي صوتس اكثر

الوالده : اقول وينس وراتس تأخرتي

انا : يمه ابنام عند ام المزايين

الوالده: اقول اهاا بس هذا كبرتس وتنامين عندهم
استحي على وجهتس ابوهم موجود

عاد اقول في نفسي (( الله واكبر واذا صار عاد ابوهم موجوود ))

وارد عليها وانا كلي اسى : يمه تكفين .. بكره البنات الظهر يبي يجون
لان ام المزايين مسويتن غداء وعازمتن البنات <<< ايه هين عازمه

الوالده : خلاص تعالي وبكره الظهر روحي لهم اماا تنامين معصي

انا ((( والعبره خانقتني تقل بزر ))) : يمه وشوله اطق مشوار مرتين
ما يمدين ارجع البيت الا اخذلي عشر ساعات وانا راجعتن لهم
خلين مرتن وحده انام واجيتس بكره بعد العزيمه

امي (( ساكته لا تنطق ))

انا : هاه يمه وش قلتي .؟؟؟

الوالده : انا اشهد انتس علتن على قلبي
نامي باللي ما يحفضتس

((( لا احد يستغرب هذا اسلوب الدلع عند اميمتي )))

وانا اجيك قامزه وامطخ ام المزايين من الفرحه
يا سعدي ابنام عندكم ..

عاد تقول زينة البنات:: لاااا وش حيثك<<<< يلعن ام المبزره ههههه

انا : دقي على امك قولي ابنام
خل نفلها اليوم تكفيييييييين

ومير هي اللي بدت تقتنع
وضاق صدرها ماتدري وش تصرف امها فيه

وتجي تدق على امها

واشووووف خشتها كل مالها تلفع اكثر
قلت بنفسي اكيد ان خالتي معطتها كم كلمه دلع

ومن هنا ومن هنااا ضحكت ضحكه حبيثه
عرفت انها سيطرت على الوضع

وتاشرلي وهي تكلم امها
وتقوول كذا

عرفت انا حليفنا الانتصااار << قويه الكلمه

وارووووح اركض ابشر ام المزايين
ومير هي اللي تقوم وتضف صينيه العشاء
وتقول تصبحون على خير
انا لو ابطاوعكم ما داومت بكره <<< يلعن ام الدفاره هههه

ومير قلنا اشوى انها راحت تنام خل نطق طق على النت شوي بدون ازعاج

ماتلاحضوون اني قعدت اسولف ونسيت سالفه البرجوون

اسمعوا عاد الصدز

قمنا الظهر ولقيت ام المزايين توها جايه ومعها كيت كات لي ولزينة البنات
تفرحنا فيه وتراضينا بوه عقب مانامت البارح وجحدتنا

وانا قاعده اتلذذ باكل الكيت كات ومير يرن جوالي <<<<يعني اسمعو ان عندي جوال

وارد . هلا اميمتي

الوالده : وين خالتس ؟؟
((( امي ملكعه تدق على جوالي تقول وين خالتس
كنها مزاعلتن )))

قلت يمه بالحمام الله يكرمتس <<< صرفتها هههههه

قالت عطين : ام المزايين<<< طبعا ما قالت ام المزايين قالت الاسم الحقيقي

وترد عااااد اسمعه وهي تكلم امي انواع القرامه

تسلم وتسأل عن اخواني واخواتي واخواني <<< احم
كنها حرمتن جايبتن عياااال ترى العلم اني اسولف على ان الم المزايين بنت خالتي هع
مهب ام المزايين اللي معكم تشابه اسماء يعني ههههههههههههههه

المهم امي قالت : تعالو للبيت تغدو معنا اننا مسوين صينيه خضار
((صيدك تغدوا معنا
الا تبينن اجي عشان تمردسينن ))

قلنا والله ما اشتهينا نبي رز برياني

قالت: ابد تعالو ومالكم الا الرز البرياني (( احساسي انها ناويتن شر))

عاد قلنا خل نروح وش ورانا بدال ما حنا متجطلين بهالصاله ومن قناة لقناة

ومييير نجزم ونروح وتغدينااا ابشركم
وعقبين قلنا وين مشواركم الليله؟؟ بحكم انه يوم اربعاء ونبي ندوووج

قالت الوالده : ماندري
قلت لامي وش رايتس تدقين على عمتي ونروح لاي مكان
قالت : ميخالف بس وين نروح ؟؟؟

وبعد مشاورات عده وبعد ما طلعت ريحتنا قررنا الذهاب الى
((((((البرجون))))))

وما ادراك ما البرجون ..!!

المهم عزّمنا وقمت اتروش ابشركم والله ماكان عندي نيه بس الروحه اجبرتني .. (( حسبي الله عليها ))

وزينة البنات قالت والله يا انااا ابتروش مالك امل
وانا مالي الا اربع ايام عن التروش (( بيني وبينكم ترى معها حق))

وام المزايين الله يستر علينا وعليها الظاهر انها ماتدري وشلون شكل الحمامات من جوا

المهم ماعلينا

دقت الساعه 5:45 مغربا
واثرنا كلنا متجهزين وعلى سنقة عشره

ويركبون اهلي مع عمتي وحنا يالبنات نركب بالبنز
ونشغل الغزال الشمالي (( اللي يشوفنا يقول هذولي من حقين قصر الرياض للاحتفالات ))

ومعنا سواق هندي تووه بقراطيسه
وبدميجته انواع الدبااشه
تصدقون انه مره عكس السيد بشاارع عام وبالعليا بعد وحنا ووجيهنا ما حسينا الين العالم ضربو بواري همين درينا اننا مسوين زحمه على العالم ..

(عاكسين السيد وبنز بعد.. الله من زين الطبايع
هذا اللي يقول شين وقوية عين )

لااااا واسمعوا عاد مصطلحات ام المزايين لاجت تتكلم معه

تقوووله :

الى آخر = امش قدام يعني طوول
اطلع برى = يعني خذ يمين او ادخل المخرج
ادخل جوا = يعني خذ خدمه او ادخل حاره
مافيه كذا = لا تسررررع

((( هذي يقالها تبي تفهمه . الحين هو يبيله مترجم )))

طبعا هذا غير انها تعكس اليمين تخليها يسار واليسار تخليها يمين
بغت تؤدي بحياتنا مره الى الهلاك <<< حلوه تؤدي صح ؟

مره كنا طالعين مصممه تقوله خذ يسار ومابوه شئ على يسارنا الا نخل وصباات
وهي تبي المخرج اللي على اليمين
والهندي يسألها يقول يسار ؟ << يبي يتاكد قبل الحادث

وهي تقوول ايه خذ يسار <<< مفهيه الاخت

وانا ابشوووف وش تبي ذي

والدبشه مطاوعها يبي يلف
ويوم جاء يلف ومير تصرخ عليه بغى ينخرش عقله الضعيّف
تقوله لالا يمين <<<< وش عقبه

واذا خانقتها والا قلت لها انتبهي تقعد تزمر علي
(( ايه عشانه سواقكم تزمرين علي)) <<< توها تفطن ترد عليتس

المهم ..
ماصارت الساعه 6 ونص الا وحنا واصلين البرجوون

فصخنا عبينا <<< لا يا شيخه

ورحنا الحمامات الله يعزكم وضبطنا شوشنا
ونفخنا ريشنا (( ابن امها الحين اللي تكلمنا ))

تسوقنا ولعبنا وفليناها الين الساعه 9
وعاد جينا بنتعشاء ونفتش جيوبنا
والله يا بنت الحلال الجيوووووب فاضيه

انا رصيدي المتبقي = ريالين لا اكثر
وام المزايين= خمسة اريل لا اكثر
وزينة البنات لقت بعد لعنة الجدف والتدوير اللي مهوب صاحي ريال ومتعرفط بعد الين قال بس (( احس انه يصيح يقول ياليتني ماصرت ريال لو صاير نعله ابركلي ))

تورطنا وضاقت صدورنا
اقسم بالله اننا نلهث من الجوع ومامعنا الا ثمن تريل

قلت : يا بنات امشوووا بس يفرجها ربكم

(( طبعا مانقدر نروح نشحذ من الاهل لانه بيعطونا نعل مهوب فلوس ))
(( من كثر ما ناخذ منهم عاااد بس مدري وراهم يمنون علينا ))

وندخل ماكدونالدز <<<< اف عجزت اكتبها
(( طبعا هذا المطعم موجود بنفس المركز النسائي ))

ونقعد بطاوله ناس كانوا قايمين وخالصين متعشين وتاركين اللي عقبهم
((( عاد حنا لقيناها فرصه وقعدنا عشان على بالنا اذا شافونا وشافوا القراطيس والاكل قدامنا يحسبونا نتعشى ولا يقومونا ))
<<< شفتوا وشلون التفكير >>>

تيجكم السالفه عاد

قعدنا على الطاوله والطاوله اللي جنبنا مليانه بزارين
وكل بزر معه شغاله
وكل شغاله معها بوك وجوال ( مهوب جبن بوك هذه بوك قرنقش )

يلعن ام الحاله .. مانبي شغاله وجوال نبي نتعشاء بس

المهم يا طويلين العمر

قعدنا سولفنا وحنا سعابيلنا تقاطر واللي يشوفنا يقول هذولن تافلات النعمه من الشبعه
(( والحقيقه اننا ملحطيييييييين ))

والزينه البزر اللي جنبي حطت بالماك برجر حقتها ( ماني متأكده من اسم الوجبه )

حطت 4 علب ما يونيز وانا بصراحه حامت تسبدي وانا اشوفها تشرب المايونيز تقل ماء
(( عاد من حبي للمايونيز ))

قلت لها : ترى ينفخ المايونيز ويضر مسامات القلب
(( مير ابسئلكم القلب له مسامات ؟؟ ترى من يوم قلت لها وانا ضميري يأنبن ))

قالت البنت : انا احبه عادي

قلت لها : خوذي الكتشب .. تبين كتشب ؟؟؟

والتفت على ام المزايين وزينة البنات واقول : بقى كتشب ؟؟؟

عاااد هم يناظرونن وبهم الضحكه واضح اني قاطه الميانه مع البنت

قالت البنت : لا ما احبه

واقول بقلبي (( انا احبه .. عطين الوجبه وانا اوريك بووه ))

وما بط اتسبادنا الا هالفلبينيات اللي معهم
يا جماعه تصدقووون ان وحده من هالفلبينيات تهرج انجليزي << احلفي بالله

جلسنا وحاولنا نحتك بالبنت
وعااااد جتك ام المزايين اعدمتهااا وقالت : لو سمحتي << شوفوا الادب بس

ردت البنت : هلا

ام المزايين : هذولا الشغالات تبعكم ؟؟؟

البنت : ايه ليش ؟؟؟

ام المزايين : لا بس اسأل
وكم شغاله عندكم ؟؟

البنت : ما ادري كثيييير

ام المزايين : (( طايرتن بوهته ))

البنت : والله نص شغالاتنا ماعرف اسمائهم ( بدت تفقش علينا )

انا انا تحكن البلاغه ودي اعرف من أي عائله ..

قلت : من أي عائله انتم ؟؟؟

ومير ما امداني اسأل الا خرت باسم ابوها والعائله
((مهب مثل خششنا لا احد سألنا قلنا مالك دخل..
الله من زين الطبايع ))

طبعا قالت اسم العائله ولكن لا استطيع ذكر العائله للستر على البنت وقبيلتها
<<<<< محسوبتك,, صحيح خبله بس اخلاق

وجرتنا السواليف السالفه تلو الاخرى ,,

وقالت زينة البنات: والله يابنات هذه فرصتنا للعشاء

قلنا : وشلووووون ؟؟

قالت : نشبك معها وتعشينا هي على حسابها

قلنا : هقوتك يعني

قالت : ابد ازهلوها

ومير تنط وحدتن من البزارين اللي جنبنا وتصررخ وتقول :

بتووول يا بتوووول تصدقين جوالي فيه 55 مكالمه لم يرد عليها
ولا حسيت

اااه يلعن ام القهر
انا جوالي حاطته على اعلى شئ ابيه يرن ابن الايه ما رن
والا من حلات وجهي اذا جيت ازمر عند احد
اخلي وحده من البنات تدق علي وانا يعنني ما ارد ثقل
والا اتأفف نطحهم يعني ترى افهموا ان جوالي انواع الازعاج
((( وهذه الحركه اسويها انا وبقية الشله )))

وعاااد البنت تخانق الشغاله : ليه جوالي يرن ولا دريت
ابوووك وش ذنب الشغاله تخانقينها

وانا من جوا محترقه ودي اقوم العن جدفهااا
اقول بلاك لاهيتن بالأكل ما نتب لم الجوال

عاد خشت زينة البنات عرررض وقالت للبنت :
تصدقين ان ابووك طلع صديق ابوي
انا تو شكيت بالاسم وسألت ابوي وقال ايه اعرفه
(( يخرب بيتها بنت خالتي تعرف تشبك ))

عاد البنت انبسطت وفلتها معنا
وزينة البنات تنغزنا بعيونها وترفسنا برجولها
وتهمس يالله قوموا
قلنا : وين ؟؟
قالت : قوموا بس
قمنا
قالت البنت: وين وين ؟؟؟

عاد زينة البنات تهرج : ابد الله يسلمك نبي نروح نشتري شويه اغراض
بعدين نرجع نتعشى
قالت : ليه انتم ما تعشيتو ؟؟

قلنا : لا
قالت : لا ما يصير
قلنا : وش اللي ما يصير ؟؟
((وكني داريه ان كل وحده تقول بنفسها الا يصير ومليون مره للملحطين اللي مثلنا ))

عاد البنت على بال امها تتميلح قدامنا
قامت نادت لندا ((طلعت لندا هي الفلبينيه اللي تهرج انجليزي ))

وقعدت تهرج معها بالانجليزي يمين بالله انها تقل من حقين المناهج اللي يسردون بالانجليزي

وحنااا نتفرج وطايرات بوهناا (( يعني فاجين افامينا وفاتحين عيونا بقوه مع مزيج من الدهشه والاستغراب ))<<< ابوك يالفلسفه

اثر بنت الحلال تقول بالانقليزي للفلبينيه : ترى ذولا عشاهم علي

((عاد ودي لو اني اهرج انقليزي واقول : لو في امك خير عشينا رز مندي والا مضغوط مهوب خبزتين وبينهن لحمه ولا وبايته بعد
يالله لك الحمد ))

عاد حنا على بالنا مسوين عزة نفس
لا لا .. لا تحرجينا
نبي نتعشى بس ماحنا مشتهين العشاء الحين (ايه هين )
ومن هالكلاام

البنت معزمه ( صدق بزر بس شكلها راعية هوم وورك )
وودي لو اقوم ابوووس على راس زينة البنات
مع انها صتيمه لكن تطلع عليها افكار احيانا
يعني لا غنى عنها ..

..

ومير نتعشى ونعين من الله خيررر ونفلها وونبسط
((يا شيخ لو تجي الحين وحده تعطين كف من الباب للطاقه عادي
هماي متعشيه بس))

ومرت ساعتين الا ربع على قعدتنا
شكرنا البنت وقلنا لها انعم الله عليك
ومير نسحب عليها
وطلعنا من ماكدونالدز عاااد وحنا طالعين فيه وحده قصمنيجه
ودي لو اننا مصادقينها شكلها زاحفه
تقول وهي داخله : يا عزيلي وشلون اباقف بهالسرى
هذا وهم مقاطعين تسذا اجل لو انهم ما قاطعوا وش بيسوون!

وارد عليها بقلبي واقول (( كل ممنوع مرغوب وانا اختس ))

وعقب ما طلعنا شفنا العالم متجمعه عند لعبه ... والامن موجود
قلنا يلعن ام الفله شكله مضااارب
قالت زينة البنات : لا والله شكله اردى لان الامن موجود
(( الامن ما يتواجدون الا بشئ كايد ))

ومييير اللقافه ما خلتنا نستنتج طلعنا ووقنا من بعيد
واثر صاحبه المشكله وهالتجمع اخت ام المزايين
عمرها حوول 11 سنه بس عليها لسان يقول عمري 25 سنه
لا اله الا الله <<< قاعده اهلل ياأم المزايين

المهم ما حبينا نتدخل بالسالفه وقاعدين نتفرج من بعيد <<< منذله صحيح

لان نعرف انفسنا ان دخلنا بمشكله تهورنا وعدمنا امينها
ماعقب سالفه يوم نقلب القريه السياحيه بالقصيم
وبعدين كنا شبعانين لو اننا على جوعنا كان لعنا والد والدينهم
حطينا حرة الجوع بهم

ويوم خلصت المشكله
ونمسك اخته على جنب
تعالي يا لتسلبه وش انتي مسويه ؟؟؟

قالت : ماسويت شئ بس صاحبه اللعبه نزلتني

قلنا : ليش ؟

قالت : اكتشفتني وانا مزوره الاسواره

طلعت بنت الحلال مزوره اساوره اللعب وتلعب بدون فلوس

سألناها وشلون زورتي .؟؟

قالت : لقيت سواره طايحه اخذتها وشريت لصق بثلاث ريال
ولصقتها ولعبت من يوم جيت الى الحين

يوم قلنا ليش ؟؟

قالت : اشتري لصق بت 3 ريال ولا اشتري سواره بـ35 والعب على كيف كيفي

((( بنت اللذينا تفكر )))

والله يا ضحكنا ضحك

قلت ايه بعدي بنت خالتي
قلت يا بنت الحلال وسعي صدرك هذاك من اليوم تلعبين ماحد درى عنك ويوم بقى نص ساعه ويسكرون زعلتي
ما شبعتي لعب

قالت : الا بس ليش تتنذل علي .؟

قلت: عاد كولي مانيب قايله لا اخلطك الحين

وترن الساعه 12 ونص
ونطلع ونروح البيت ووصلنااا ام المزايين

وضحكنا سويا <<< حلوووه سويا كني من حقين روايات عبير

ووصلنا للبيت ابشركم بالسلامه
وكل عام وانتم بخير <<< اخطمت

توته توته خلصت الحتوته
حلوه والا فتفوته .؟

الفايده من سرد القصه ::

1: الفاضي اللي ماعنده شغل اشغله بهالقصه
2: قبل ما تروحون أي مكان افصلوا فلوس العشاء عن الخنبقه عشان ماتنكبون مثلنا
3 دايم حاول تحتك باحد معه قرنقش (تحتاجه لليوم الاسود هههه )
5: قاطعوا المنتجات الامريكيه <<< يا شيخه اقلبي وجهك

يالله جان النوم تصبحون على خير

قاهر الحب · 07-01-2007, 07:46 AM

ههههههههههههههههههههههههههههههههه

خخخخخخخخخخخخخخخخخخخخخخخخخخخخخخخخخ

الله يرجكم وعلى فكره عسكريمه الجلد لها مسامات مو القلب ههههههههههه

عسكريمه · 07-01-2007, 08:38 AM

لا تخلي ضميري يأنبن رجائن هههههههههههههههههههههه

مير يعطيك العافيه على مرورك وتعليقك

الهايم · 07-01-2007, 09:35 AM

حشا ماهي قصه فلم هندي و مدبلج بعد هههههههههههههههههه

عسكريمه · 07-01-2007, 02:13 PM

هههههههههههههههههه ايه وانا اكتب القصصه قاعده افص فص على فلفل هع

بــســمــه · 07-01-2007, 02:30 PM

ياشيخه الله يغربلك قولي امين
وش هالسواليف ماصارت
بس تصدقين حلوه يبيلنا نسويها بالواقع

عمرتو · 07-01-2007, 10:42 PM

بسم الله الرحمن الرحيم...مشكوره عسكريمه على هذه القصه وعقبال الدعوه التاليه بس تعملى احتياطيات للمصروفات المهم المره دى ربنا ستر .....بالتوفيق ان شاء الله عسكريمه.

عسكريمه · 08-01-2007, 12:05 AM

ام المزايين صارت عاد بالواقع بس اهم شي الاخلاق وحب الوطن ههههههههههههه

عمرتو ايه خلاص من هذاك اليوم وانا حاطه لي حصاله <<ماتعرف تكذب مير هههههههههههههههههه

يعطيكم العافيه على هيك طله حلوه

أجـمـل غـرااام · 08-01-2007, 12:13 AM

هههههههههههههههههههههههههههه

امه الله · 08-01-2007, 12:10 PM

هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه هههههههههههههههههههههههههههههههههههههههه

يا مرووووووووووووووشة..
حلوة القصة..

سرور · 08-01-2007, 12:47 PM

وانا مصدقه ان القلب له مسامات مالت على خشمك اللي مافيه مسامات

وبعدين تروحون الماكدونالدز <<كتبتها بسهوله

وماتعزموني من الشح والبخل اللي فيكم

والحمدلله مارحت وياكم ماتنزل

تفشلون والله فشييييييله وانتو راكبين البنز خخخ

كريستالة · 08-01-2007, 09:45 PM

هههههههههههههههههههههههههههههههههههههههههههههههههه ههههههههههههه
الله يشيلك وش ذا صينية خضار وبرياني
ياذكيه كان قلتي ودي بوفيه مفتوح
والله مت من الضحك وعيوني دمعت
تدرين امي جت تقرا وقعدت تضحك وقالت كان هذي سواليفكن يخلف الله

عسكريمه · 09-01-2007, 01:38 AM

اقتباس:

هههههههههههههههههههههههههههه

اجمل غرام ياليتك ماعلقت تسذا احس انك احبطتن وضحكتك ذي مجامله <<<تدور شي حوله تبي تلخوووه هع

ــــــــــــــــــ

امه الله

والله اني شايلتن هم اقول لا تقول مافهمته وهمن اترجمه بالمصري مثل الطفاقه هههههههههه

بس يعطيك العافيه على هيك طله

عسكريمه · 09-01-2007, 01:54 AM

اقتباس:

تفشلون والله فشييييييله وانتو راكبين البنز خخخ

رجائن انتي بس تشوفين الرزه الي مسوينه تحلفين ولا اسره مالكه هع

يسلمو على هالطله هع
ــــــــــــــــــ

اقتباس:

تدرين امي جت تقرا وقعدت تضحك وقالت كان هذي سواليفكن يخلف الله

هههههههههههههههههههههههههههه ياحوليلك كرستاله هانم

اجل موريتن فضيح مامتك

يالله بسرعه اكتبي رد ثاني وش قالت امتس عن الموضوع <<ماتنعطى خشه عاد

ويسلمو على المرور للجميع

عسوله · 09-01-2007, 07:59 PM

ههههههههههههههههههههههه

صدقيني 000انك عسل000روعه القصه000بس المره الجايه لاتنسي سرور

لاتروح تطقكم بعين000تذبحكم تراااها قويه000وحرااام تأجري تكسر الخاطر البنيه

ودها تزور هالاماكن معكم000>>> بس عشان تحموا نفسكم من عين بسومه

عغسكريمه روعه بقصتك وحضورك0000ننتظر الاروع دوما منك

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور


الرئيسية - التسجيل - لوحة التحكم - مركز تحميل الصور الملفات - طلب رقم التنشيط - دليل مواقع السيف - القرأن الكريم - الصفحة الشخصية لحور - أسعار الاعلانات

الذين يشاهدون محتوى الموضوع الآن : 1 ( الأعضاء 0 والزوار 1)

(إظهار الكل) الأعضاء الذين شاهدوا الموضوع : 0
لا يوجد أسماء لعرضها.

البرجون هع

منتدى القصص القصيره